Զարմանալի է, բայց կան բառեր, որոնք գույն ունեն, համ ու հոտ, ձև ու ձևապատկեր: Ո՞րն է ազատության  գույնն ու հոտը, ձևն ու ձևապատկերը: Այս հարցերին փորձել են պատասխանել Կոտայքի մարզի տաղանդավոր մանուկները: Աբովյան քաղաքի Հայ-Ռուս բարեկամության թանգարանում  տեղի ունեցավ «Անկախությունը տարբեր սերունդների  աչքերով»  նկարների ցուցահանդես: Կոտայքի մարզի երիտասարդ և փոքրիկ նկարիչները ազատության մասին իրենց գաղափարները հանձնել էին թղթին: Նկարների առարկաները  տարբեր էին`աղավնիներ, բնության երևույթներ, Երկիր մոլորակ, ՀՀ խորհրդանիշներ, մանուկների վառ աչուկներ և իհարկե, երփներանգ  գույներ, այս ամենը ներառված էին փոքրիկների նկարներում: Ապագա նկարիչներից ամենախիզախները  մեզ պատմեցին իրենց և իրենց նկարների մասին.

Շահբազյան Սուսաննա

-Այսօրվա ցուցահանդեսին դրվել է իմ նկարած կուժերը: Տասը տարեկանից նկարում եմ: Սիրում եմ բնության տեսարաններ նկարել: Երբ փոքրիկ էի  անընդհատ նկարում էի, երբ դարձա տասը տարեկան, մայրիկս ինձ տարավ նկարչության դասերի: Ուրախացա, երբ իմացա ցուցահանդեսին իմ նկարն էլ է լինելու:

Արամյան Քնարիկ

-Նկարել եմ արագիլ` շրջապատված պատերով: Արագիլն ուզում է պատերի ներսից դուրս գալ և ազատ թռչել իր համար դեպի ազատություն: Ազատության մեջ վառ գույներ կան: Արագիլն էլ իմ խաղաղության խորհրդանիշն է: Խաղաղության գույնն էլ սպիտակն է:

Էլիզա Բաղրումյան

-Որոշեցի ցուցահանդեսին ներկայացնել իմ նկարած կուժը, որի մեջ վառ գույների ծաղիկներ են: Ծաղիկներն էլ խորհրդանշում են  խաղաղությունը: Խաղաղությունն էլ, մտածում եմ, վառ գույներ ունի:

Չերքեզյան Նոյեմի

-Ես Բյուրեղավանից եմ: Երբ ասացին ցուցահանդեսի մասին, որոշեցի նկարել Հանրապետության հրապարակը գեղեցիկ գույներով: Ուզում եմ, որ Հայաստանի Հանրապետությունը այսպես գունավոր միշտ լինի: Մարդիկ էլ, տեսնելով խաղաղության  գույները, ուրախանան: