Հարցազրույց մայրիկիս՝ Արուս Բաբաջանյանի հետ
-Մամ, կպատմե՞ս քո մասին:
-Սիրով։ Ես տնային տնտեսուհի եմ, ինչ-ինչ պատճառներով ուսումս կիսատ եմ թողել։ Պետք է կառավարիչ դառնայի, սակայն դեռ դպրոցից սիրել եմ մանկավարժի աշխատանքը և երազել եմ դառնալ տարրական դասարանների դասվար։ Երազանքս որոշ չափով կատարվել է, քանի որ հիմնականում զբաղվում եմ երեխաներիս դաստիարակությամբ և օգնում նրանց ուսման մեջ։
-Որոշ տնային տնտեսուհիներ իրենց գործը ձանձրալի են համարում, համամի՞տ ես այդ կարծիքի հետ։
-Իմ կարծիքով ձանձրալի է այն գործը, որը սիրով չես կատարում: Երբեմն օրերը միօրինակ են անցնում, բայց ես փորձում եմ ինձ համար հետաքրքրություններ գտնել։
-Օրինակ, ինչպե՞ս։
-Օրինակ՝ գտնում եմ նոր ճաշատեսակների բաղադրատոմսեր և փորձում եմ պատրաստել, ֆիլմեր եմ դիտում, կարդում եմ, և այլն…
-Լա՛վ, իսկ բացի մանկավարժից, ուրիշ ի՞նչ մասնագիտություն կուզեիր ունենալ։
-Կուզեի դերձակ-մոդելավորող դառնալ,մի քիչ կարում եմ, բայց կցանկանայի մասնագիտանալ այդ գործում։
-Իսկ ինչո՞ւ դերձակ-մոդելավորող։
-Միշտ սիրել եմ հագնվել յուրովի, ուզում եմ կրել իմ մոդելավորած հագուստը։
-Իսկ ի՞նչ ոճի հագուստ ես նախընտրում։
-Սիրում եմ քաղաքային ոճը և իհարկե, դասականը։
-Իսկ ինչպե՞ս ես անցկացնում հանգստյան օրերը։
-Ընտանիքիս հետ,որովհետև մնացած օրերին բոլորն իրենց գործերով են զբաղված:
-Ո՞րն է քո կարծիքով իդեալական արձակուրդը։
-Իդեալական արձակուրդն իմ կարծիքով առօրյայից կտրվելն ու բնության գիրկն ընկնելն է։
-Ի՞նչ խորհուրդ կտաս այն աղջիկներին, ովքեր դեռ չեն ամուսնացել և չգիտեն, թե ինչ է նշանակում լինել տնային տնտեսուհի և ընտանիքի մայր։
-Խորհուրդ եմ տալիս աղջիկներին, ինչ մասնագիտություն էլ որ ընտրեն, կամ, եթե տնային տնտեսուհիներ դառնան, միշտ լինեն կանացի, գեղեցիկ,բարի և ուժեղ։ Այս է լավ մայր դառնալու գրավականը։