Լուսանկարը` Դիանա Շահբազյանի

Դեկտեմբերի 3-ին Հաշմանդամների միջազգային օրը, ՄԱԿ-ի հայաստանյան գրասենյակում տեղի ունեցավ «Ձեռք ձեռքի» մանկապատանեկան արվեստի III ինտեգրատիվ հանրապետական փառատոնի փակումը:

Փառատոնի հիմնական նպատակն է հաշմանդամություն ունեցող երեխաների ստեղծագործական ներուժի բացահայտումն ու ժամանակակից աշխարհում նրանց լիարժեք ինտեգրումը, իսկ հայեցակարգային առանձնահատկությունն է` հաշմանդամություն ունեցող և չունեցող երեխաների ստեղծագործական միասնական աշխատանքների կազմակերպումը, համատեղ ստեղծագործական ծրագրերի միջոցով նրանց միավորումն ու հասարակության մեջ հանդուրժողականության մթնոլորտի ձևավորումը:

Լուսանկարը` Դիանա Շահբազյանի

Փառատոնը անցկացվեց արվեստի 7 ճյուղերը ներկայացնող ոլորտներում՝ երաժշտություն, նկարչություն, քանդակագործություն, դեկորատիվ-կիրառական արվեստ, լուսանկարչություն, թատերարվեստ, կինոարվեստ:

Եզրափակիչ միջոցառման ընթացքում ՄԱԿ-ի հայաստանյան գրասենյակում տեղի ունենացավ մանկապատանեկան դեկորատիվ-կիրառական աշխատանքների ցուցահանդես-վաճառք, համերգային ծրագրով ելույթ ունենացավ «Երևան» լարային քառյակը, ցուցադրվեցին «Մանանա» կենտրոնի ֆիլմերը, ելույթ ունեցան տարբեր մանկապատանեկան երգչախմբեր: